Kuch Toh Kami Hai

Tum main kuch kami hai,

Tum main naheen, toh uss main kami hai,

Iss dastoor peh he toh dunya bani hai,

Bin aal aulaad, tum main kuch toh kami hai,

Tum chaho kya, tum mano kya,

Gharz uss say kisi ko kuch naheen,

Bus lakeer kay fakeer jo na ho tum,

Toh tum main kuch toh kami hai,

Azal se abad tak, chalta aaya hai bus yehi,

Umar kay takazay kaho ya kuch aur,

Loagoon kay sawaaloun ka naheen hai jawaab,

Toh tum main kuch toh kami hai,

Yeh kaisi khahish hai, yeh kaisi marzi,

Kon karta hai aisa, kyun kehtay ho khudgharzi,

Hum toh maang rahay woh jo hai riwaajh,

Bus tum main he kuch toh kami hai,

Na hoti toh kyun kartay aisa inthakhaab,

Batao bhala kon bhirhta hai iss baat per,

Billawajah kartay ho iss baat peh israar,

Toh tum main kuch toh kami hai,

Bachpun, larakpun, jawani, shaadi byah,

Aal aulaad, bhurhapa, hai dastoor-e-dunya,

Phir youn jo rok daytay ho zindagi ki garhi,

Toh tum main kuch toh kami hai,

Waqt maangtay ho, toh waqt aur kitna,

Rishta jurha hai toh nibhana bhi seekho,

Hai yeh bhi nibhna ka he hissa warna,

Toh tum main kuch toh kami hai,

Saath bitanay kay liyay umar hai tamaam,

Bus maan lo yeh, phir humko hai araam,

Tumhari he khushi chahtay hain sab,

Bus tumharay samajhnay he ki kami hai,

Yeh sun sun kay kaan bhi kuch sun say hain ab,

Kehtay hain kay woh bun jayay ga ik door,

Inkaar naheen waqt maanga per mila zor,

Kay tum main he kuch toh kami hai,

Door naheen, insaan hai woh, zanjeer na banao,

Khushi main lapait kar bairhi na pehnao,

Waqt ki zaroorat maantay ho tum ussay,

Toh phir dunya, tum main kuch kami hai,

Aadha adhoora, kuch toota kuch poora,

Bebus sa bachpun naheen dayna uss ko hamain,

Waqt do iss rishtay aur khud ko samajhnay ko,

Tumhari he soch main dunya, kuch toh kami hai,

Woh ho iss ki khatir naheen nibhana yeh bandhan,

Yeh bandhan hai iss waastay naheen lana uss ko,

Khushi bun kay aamud ho uss ki, majboori naheen,

Iss baat ko samajhnay ki he toh kami hai,

Umar beeti jayay ab toh ho ga behtar,

Jab aayay woh toh na ho phir pashtawa,

Per tum kartay ho faqt waqt ki fikar,

Toh dunya tum main he kuch toh kami hai,

Kehtay ho ab naheen toh kab,

Jawaab shayud hum ko bhi maloom naheen,

Dil say khwahish ho gee kabhi toh kaheen,

Iss baat ki samajhnay ki tum main kami hai,

Sadiyaan naheen, lumhay churanay ka hai sawaal,

Phisalnay do haath say waqt ki rait ko abhi,

Takay jab aayay toh ho woh khushgawaar khayaal,

Iss baat ki samajhnay ki tum main kami hai,

Aur kya hua agar haqiqut main kuch kami hai,

Yaksaan toh her ungli bhi naheen bani hai,

Khoon say naheen dil say hain rishtay,

Iss baat ko samajhnay ki he toh kami hai,

Apnay say bhi zada apna lain gay ussay,

Uss ki bhi zindagi main kuch toh kami hai,

Haath thaam aik doosray ka beetay zindagi, 

Iss waastay he toh dunya bani hai,

Phir phair lain kisi kay sir peh ik haath,

Paraya maantay ho gay phir tum jo ussay,

Toh phir mujh main naheen, uss main naheen,

Tum main dunya kuch toh kami hai.

~ ——— ~

Parenthood is a beautiful thing.

But in South East Asian societies it is treated differently.

A duty. An obligation. A right of passage.

Name it anything you want.

But it is definitely not left up-to just the couple.

Everyone has something to say, a lot to say.

An uncomfortable invasion of personal space, that is a concept they refuse to understand.

At this stage in life I see my own friends and their siblings getting hitched and the questions are raised within just a month or more.

Something highly personal is treated like a topic worthy of public debate so here goes something for this society.

The baby boomers will refuse to understand.

Millennials, I hope at least you're better parents than the generations before in this regard, understand such matters should be left to the couple alone and don't force this question answer session upon your kids.

Harjai

Punjabi for a change.

~ ——— ~

Ishq di galaan tu ki janay,

Pathar v pighlay jay payweh paani,

Per tu na samjhay dil di galaan,

Harjai houn chay na tera koi saani,

Ankh mound k rawaan badlay,

Phul jaway wafa day wadhay,

Pal chay tola pal chay masha,

Wadhay teray kandhay teh jo laday,

Hun teray toun ki karni umeed,

Parosa tera na hun kar pawaan,

Behtar wa teray teh meray liyay,

Chalday jawaan alug rawaan,

Ais chay he sanu phir toun,

Mil jaway shayud wakhra sakoun,

Chalda aagay hun na waikheen,

Bharhun day aagay hun mainu.

Bint-e-Hawa

Tu maa hai, tu beti hai,

Tu behan hai, tu biwi hai,

Anginath sanchoun main dalti,

Naimut khuda ki tu divi hai,

Teri qok say janum layti hain perhiyaan,

Tu paalnay wali bhi hai, sikhanay wali bhi hai,

Dunya ki manind kay iss ghar ko,

Tu he toh chalanay wali bhi hai,

Khud ko kamzor na samajhna bint-e-hawa,

Teri takut se larazte hain yeh sab,

Tujhay diyay huay aik aik zakhum ka,

Hisaab lay ga khud tera rub,

Tu hai toh tujh say hai yeh jahaan,

Anjaan bunana chahain jitna yeh log,

Bhool jayain teri azmut ko,

Tujh peh lagayain sau rog,

Tu mut bhoolna kay tu kum naheen,

Woh aadum ki aulaad tu hawa ki beti,

Barabur hain yaksaan insaan sabhi,

Dunya bhi iss baat ki gawahi dayti,

Woh haath uthayay toh,

Tu hoslay buland kar layna,

Woh gar tujhay takleef day,

Toh tu bhi yaad dila dayna,

Kay kamzor naheen tu,

Tera toh hai dil barha,

Tu charhti ja oonchaiyoun ki seerhiyaan,

Teray saamnay na kuch rahay ga kharha,

Tu haath thaam kay toh daikh,

Behan maan tu bhi baandh lay dor,

Teri takut tu khud hai, aur hain teri behnain,

Phir daikh, daikhay ga kaisay koi teri ore.

Doori

Tootay dil kay manzar ko,

Kabhi aankho main samo kay daikho,

Aankoun main bassay khuwaaboun ko,

Palkoun peh aasoun ki jaga, sanjho kay daikho,

Kabhi kisi deewani ki yaadoun main,

Kho kay toh tum daikho,

Samajh jao gay tum bhi kabhi,

Izhaar hum say kyun hota naheen,

Chah kar bhi kitna iqraar-e-ishq,

Hota hai yeh, bus ab naheen,

Darguzar kar dil ko dua maangta,

Kay khush rahay woh ho jahaan kaheen,

Issay pagalpun na mera tum samajhna,

Yeh toh meray ishq ki inteha he,

Kay jo ho, woh paas ho na ho,

Milay ussay bus tahayaat khushiyaan sabhi,

Namukamal sa ishq, kamil ho ga mera,

Muskuraye gi woh jab phir say, bus tabhi,

Ashiq ki khushi mashooq ki muskurahut main,

Qurbani naheen yeh toh hai wada nibhana,

Rangoun say bharnay uss ki zindagani,

Ka bus ik aur hai yeh bahana,

Hum doob bhi gayay toh gum naheen,

Jeenay kay liyay, toh pus dildaar ko hai bachana,

Dukhoun ko dariya hoon,

Mushkiloun ka main samandar,

Tootay say wajood main na bacha kuch,

Khali sab hua, jo tha diloun kay andar,

Bayjaan hoon bayhis naheen, 

Paas hai faqt yaadoun ka khundar,

Ussay rokta, ussay thaamta,

Toh tootay tukroun say torh sakta tha,

Phir na janay iss bikhray wajood say,

Ussay main kaisay jorh sakta tha,

Jhinjorh sakta tha, zindagi say dhorh sakta tha,

Per aansoun ki keemut say, khushiyaan na nichorh sakta tha,

Main toh hoon andhairay ka musafir,

Hathayli peh jaan liyay phirta hoon,

Ussay paa kar torh na doun,

Iss soch say bhi ab toh chirhta hoon,

Bhir loun ga zindagi say uss ki khushi kay waastay,

Aakhir ko toh, roz he, kisi say bhirhta hoon,

Wada hai khud say liya bus ab, 

Ussay apnay wajood say rakhoun ga door,

Yeh saza he behtar hai bus,

Chahay ho mushkil yeh zaroor,

Karloun ga yeh bhi ab main,

Khatir uss kay, jo kismut ko manzoor.

Saath

Chaman main, gulzar main,

Unginat alfaaz kay izhaar main,

Bhi na samo sakoon tareef teri,

Na kaafi karta wajood tera, shayari meri,

Fursat say banai gai haseen tasveer,

Her ranjhay kay khwaab main basnay wali heer,

Kohinoor ka jeeta jaagta roop,

Ya sardi ki subah ki madhum si dhoop,

Teray liyay jo kar sakoon bayaan,

Teri hasti ki dilkashi ho jin say aayaan,

Woh bund na kar paoun tehreer,

Teri kurbat main murshad hua yeh peer,

Samandaroun ki doori main tujh say jorhay ik karhi,

Paar karti ussay, woh jo her deewaar kharhi,

Waqt kay panoun main likha tera mera milna,

Alug bhi hum, yaksaan bhi, manay yeh dil na,

Tu chaand hai toh main taaroun barhi raat,

Abad tak na tootay ga yeh saath.

Humnawa

Shor-e-duniya main khonay ko,

Hum tanhai khona naheen maantay,

Kisi bheerh main khonay ko,

Hum saath-e-duniya naheen maantay,

Tanhai kay toh puranay saathi hain hum,

Tanha honay main ab jee kya darna,

Tujhay khonay say he munsalik humnawa,

Faqt ab toh hai hamara jeena marna.

Gumaan

Muntazir hona ab kuch beeta sa kal hai,

Ab jana anmol khamooshi ka pal hai,

Faraibi sa tha yeh, ab lugta jo asal hai,

Dhalti umar ka mano yeh phal hai,

Teray laboon say ab jo chashni bahay,

Shayud ab ussay yeh zehun na sahay,

Bharh ja aagay tu bhi bin kuch kahay,

Dua goh rahoon ga kay khush tu rahay,

Jis iqraar ko sunay ko tarastay thay kaan,

Ab uss say rehna chahtay anjaan,

Jab na mukamil he rehni ho yeh dastaan,

Toh na qalum uthaana he hai asaan,

Barsabarus beetay teray chehray kay dhaagay bhuntay,

Khwaboon main teray he sapnay chuntay,

Khud he khud teri pukaar ko suntay, 

Ab rah-e-visal ko na hain chuntay, 

Kya khoob khayaal tha kay milay ga yun,

Dil kay jharokoun main kisi kay basun,

Ab samajh say paray hain kay rooun kay hansun,

Haal-e-dil ho ga kuch ajab sa he ab yun,

Deedar kay intizaar main, lafzoun ki bahaar main,

Gunguna kay tehlun, khushi kay izhaar main,

Munkin naheen, bikhray ga tu iqraar main,

Lumhay ki khushi ki dua na karni ab israar main,

Jab dard main jhatakna he hai haath tera,

Toh tamana kis baat ki kay tu thamay mera,

Azal say na likha jab sung rehna mera tera,

Phir kyun karain khwaboon main basera,

So maan lo bus ab say tum say na koi kaam,

Bhula diya khayaaloun main banta chehra aaj iss shaam,

Tu kon hai, tu hai bhi ya pus khayaal hai mera,

Haqiqut teri ab bana daytay hain gumnaam.

Aqs

Aainay main dikhta hai aks mera,

Hai ab bun raha yeh qafas mera,

Aawazain cheerti dewaroun se,

Khayaaloun kay raqs main main ghira,

Bulandi ko choothay khayaal o khwaab,

Dhoondhtay thay ajab say jawab,

Aaj pehnay afsurdgi ki chadar ko,

Dhaanptay hain bun visal ka hijaab,

Shaheen ki parwaaz ko taktay thay,

Dhorhnay say jo na thakhtay thay,

Chilaoun ab kaisay bin zubaan kay,

Kay natuk sa bus woh toh kartay thay,

Tamashbeen se bhaaghtay koson door,

Kaho issay jugna ya pana shaoor,

Toot sa raha hai phir woh sakoon,

Jo bun gaya tha kabhi gharoor,

Din gintay gintay ungliyaan thak gayeen,

Ya mano bus zakhmoun ki aadatain baneen,

Mombatiyan barheen, muskurahatain ghateen,

Ho raha phir jo hona chahiyeh tha naheen,

Koi rok do iss shor ko ab,

Ghut raha hai dum, bujta hai jub,

Samaitoun kaisay ab toottee umeedoun ko,

Rait sa haathoun say phisal raha hai sab,

Jhuriyaan barhi hain, shiknain bhi zada,

Phisaltay phisaltay kiya tha jo wada,

Mano aaj woh bhi phisal raha hai ab,

Aadha toota tha, lo bikhar raha baqi aadha.

Darharhain

Main tooti toh pehlay thee,

Per ab bikhar si gayee hoon,

Khushiyaan choothi toh pehlay thee, 

Per ab chirh si gayee hoon,

Bheegi palkoon say, 

Khoi hoi nazroon say,

Khwaab toh pehlay bhi, ab bhi, daikhti hoon,

Per tamana-e-tabeer say phir si gayee hoon,

Pankh pehlayay, palkain na jhapkayay,

Takti hoon uss chaand ko,

Umeed ki kirnoun ki muntazir,

Kostee hoon iss panaptay ehsaas ko,

Waqt ki rait main dabhi thehray,

Dayti hoon andhairay peh pehray,

Aanchal ko samatay, dil peh lagayeh tala,

Apnay aap say he toh ab bhirh si gayee hoon,

Na janay kab say yaheen sehmi hoon,

Kitna waqt beet gaya ab maloom naheen,

Larhti hoon dil-o-dimaagh say yaksaan main,

Na janay ab shikast ho gee kis ki yaheen,

Rumaal hai bheega ehsaasoun say,

Umeed jhaankti hai dil k jharokoun say,

Pal toh beet rahay hain, per main hoon tehri,

Zakhum hai dukhta ab bhi, choth hai gehri.

Manzar

Khula aasmaan, chaandh sooraj,

In ki aagosh main timtimatay taaray,

Iss dilkash manzar kay aagay hum,

Yoon he toh na thay dil haray,

Bus ab beet jayay zindagani yaheen,

Bus un yaadoun kay saharay.

Anmol

Sitamgar sa waqt hai,

Beethta hai, thumta naheen,

Kho jata hai fard agosh main uss ki,

Manzil kahaan, kuch pata naheen, 

Rah main kabhi phool toh kabhi kaantay,

Pathar, kankar, aatay hain sabhi,

Hai khuda kya, khudai kya,

Maloom hota hai sab tabhi,

Chaand aur sitaroun se saathi, 

Ruh se jism kay taaluq sa paak,

Musafir ko milain humsafar kai,

Per heera kon, faqeera kon, toh kon faqt rakh,

Tamashbeen dunya hai,

Bikhti hai sab yahaan, iman bhi afsoos,

Tera dil saaf hai, nazar shafaaf hai,

Phir kismut ko mut toun youn kos,

Iman rakh uss zaat per jisne tujhe hai banaya,

Teri achai ka mile ga tujhe mol,

Sabar kar, faryaad kar, Uss ki barahai ko yaad kar,

Milay ga tujhe bhi woh jo sab hai anmol.

Dil Jala

Dil jala,

Mun jala,

Tu jala,

Toh kya bhala,

Lugta hai tujhay,

Kay hai koi khala,

Din ruka,

Dil dukha,

Amal chuuka,

Gala suukha,

Lugta hai tujhay,

Kay sab hai pus ruukha,

Qadam tera,

Sir qalam mera,

Dukhoun ga dera,

Aasmaishoun ka sehra,

Lugta hai tujhay,

Kay sab nay hai ghera,

Tu karay toh fikar na,

Main karta hoon toh bhirhna,

Tujhay toh hai bus chirhna,

Mujhay toh tha bikharna,

Lugta na tujhay jo pehlay,

Toh phir ab bhi, na kar zikar na.

Aansoo

Uss nay mere aansoo toh daikhay,

Mera tarapna na daikha,

Mere bilaknay ko, sissaknay ko,

Jaan kar bhi kiya undaikha,

Ussay lugta hai main moum ki manind hoon,

Pighal jaati hoon, bikhar jati hoon,

Shikwa karta hai woh mujhsay,

Kyun aakhir main dar si jati hoon,

Aankh mound lo gay agar tum zakhmoun say,

Sab say jo ab tak, aaj bhi mujh peh hai beetata,

Toh phir batao kis huq say karte ho iktilaaf,

Maali toh hai phooloun ko saichta,

Main toh kisi gulshan ka naheen, 

Banjar zameen ka ik shahkaar hoon,

Mera hona ab tak hai khud main maujhza,

Kay ab bhi tun kay kharhi hoon, jaisay deewaar hoon,

Maali toh kya saaye ko jo tarsay, woh hoon,

Faulaadi sa jism ho gaiya ab, khush khoon,

Kay mousam toh beetay kai magar,

Pal phar bhi na raha chain aur sakoon,

Shikwa na mujhay khuda say, na uss ki khudai say,

Par tujhay kyun hain dar kisi ruswai say,

Woh jo uthatay hain meray sehumnay peh ungliyaan,

Unhain bhala kya mutlab, meri bhalai say,

Tamaashbeen hai duniya, lutf leti hai kamzor ka,

Barh jati hai aagay jaisa nata na koi tha,

Sehumta rahay koi, duniya ko na hai parhi,

Kafas main beetay qayamat, yeh mazloom ki saza,

Phir jawaab kay talabgaar honay ka huq bhi naheen,

Jo aaina dekhaye, per saath dikhay naheen,

Jab chilao madud ki khatir,

Toh bheerh main kho jaayay kaheen,

Mere aansoun toh meri daastaan ka hain hissa,

Kathinaiyaan toh hain, per saathi bhi na koi iss sa,

Main toh ubhar he jaoun gee aik din sab say,

Tamaam ho ga meray ghamoun ka qissa,

Tum batao tum nay kya paya toknay main,

Kiya kuch kya in aansoun ko roknay main, 

Mujhay toh waqt nay sambhala, sakht jaan bhi bana day ga,

Batao tumhain mila kya, apnay giloun ko thopnay main.

Deewana

Tootay dil kay manzar ko,

Kabhi aankho main samo kay daikho,

Aankoun main bassay khuwaaboun ko,

Palkoun peh aasoun ki jaga, sanjho kay daikho,

Kabhi kisi deewani ki yaadoun main,

Kho kay toh tum daikho,

Samajh jao gay tum bhi kabhi,

Izhaar hum say kyun hota naheen,

Chah kar bhi kitna iqraar-e-ishq,

Hota hai yeh, bus ab naheen,

Darguzar kar dil ko dua maangta,

Kay khush rahay woh ho jahaan kaheen,

Issay pagalpun na mera tum samajhna,

Yeh toh meray ishq ki inteha he,

Kay jo ho, woh paas ho na ho,

Milay ussay bus tahayaat khushiyaan sabhi,

Namukamal sa ishq, kamil ho ga mera,

Muskuraye gi woh jab phir say, bus tabhi,

Ashiq ki khushi mashooq ki muskurahut main,

Qurbani naheen yeh toh hai wada nibhana,

Rangoun say bharnay uss ki zindagani,

Ka bus ik aur hai yeh bahana,

Hum doob bhi gayay toh gum naheen,

Jeenay kay liyay, toh pus dildaar ko hai bachana,

Dukhoun ko dariya hoon,

Mushkiloun ka main samandar,

Tootay say wajood main na bacha kuch,

Khali sab hua, jo tha diloun kay andar,

Bayjaan hoon bayhis naheen, 

Paas hai faqt yaadoun ka khundar,

Ussay rokta, ussay thaamta,

Toh tootay tukroun say torh sakta tha,

Phir na janay iss bikhray wajood say,

Ussay main kaisay jorh sakta tha,

Jhinjorh sakta tha, zindagi say dhorh sakta tha,

Per aansoun ki keemut say, khushiyaan na nichorh sakta tha,

Main toh hoon andhairay ka musafir,

Hathayli peh jaan liyay phirta hoon,

Ussay paa kar torh na doun,

Iss soch say bhi ab toh chirhta hoon,

Bhir loun ga zindagi say uss ki khushi kay waastay,

Aakhir ko toh, roz he, kisi say bhirhta hoon,

Wada hai khud say liya bus ab, 

Ussay apnay wajood say rakhoun ga door,

Yeh saza he behtar hai bus,

Chahay ho mushkil yeh zaroor,

Karloun ga yeh bhi ab main,

Khatir uss kay, jo kismut ko manzoor.

Kaho Kya Khayaal Hai

Kaho kya khayaal hai,

Jis say hasti ko zawaal hai,

Roop woh bemisaal hai,

Sehrakun jis ki chaal hai,

Ussay daikh hua yeh haal hai,

Kaho kya yeh kamaal hai,

Keh sehra main jaisay dhaal hai,

Kya ab bhi dil main koi malaal hai,

Keh doon ussay ya chorh doon,

Kiya ishq nay kaisa behaal hai,

Uss kay qadmoun ki barhti dori say,

Dil toh hua nidhaal hai,

Guzray uss ko hamari gali say,

Beeta aik aur saal hai,

Na janay phir bhi kyun aur kaisay,

Dil ka toh phir wohi haal hai,

Chora tha majboori per marzi say,

Kiya ishq kuch youn apna halaal hai,

Door say tukta toh tub bhi, ab bhi hoon,

Paas hai, ehsaas hai, bus ab yehi toh khayaal hai,

Jo jeenay ka sahara bana hai tehra,

Teray ishq ka he toh jalaal hai,

Tujhay bhooloun, aagay barh jaoun akailay,

Iss na cheez dil ki kya majaal hai.

Murshad

Chaman main, gulzar main,

Unginat alfaaz kay izhaar main,

Bhi na samo sakoon tareef teri,

Na kaafi karta wajood tera, shayari meri,

Fursat say banai gai haseen tasveer,

Her ranjhay kay khwaab main basnay wali heer,

Kohinoor ka jeeta jaagta roop,

Ya sardi ki subah ki madhum si dhoop,

Teray liyay jo kar sakoon bayaan,

Teri hasti ki dilkashi ho jin say aayaan,

Woh bund na kar paoun tehreer,

Teri kurbat main murshad hua yeh peer,

Samandaroun ki doori main tujh say jorhay ik karhi,

Paar karti ussay, woh jo her deewaar kharhi,

Waqt kay panoun main likha tera mera milna,

Alug bhi hum, yaksaan bhi, manay yeh dil na,

Tu chaand hai toh main taaroun barhi raat,

Abad tak na tootay ga yeh saath.

Ishq-e-Khaliq

Aankhoun main nami hai,

Khuwaab hain raiza raiza,

Sukhay laboun peh dua,

Hath bulund hain o rangraiza,

Kya qayamut bun kay tooti zindagi,

Waseeyeh duniya rahain anjaan,

Tarapta bilakta sehumta lautata,

Hai tujh ko he bus insaan,

Ghamgheen hai, nidhaal hai,

Khoya beech dunya kay shor,

Phir bhi bayaar-o-madadgaar woh,

Taruf teri he lagata hai dhor,

Rangeen hai, ghamgheen hai,

Maamla bhi kuch sangeen hai,

Per iss hulchul say azaab main,

Sabit kadum rakhta, tera he deen hai,

Kya ajab kamaal hai, mano toh bemisaal hai,

Kay mohabbat aur mehboob ki khatir jo khaakh chaanta,

Ishq-e-khaliq main he uss ka sakoon,

Bus yehi toh hai na woh jaanta,

Teri qudrat say dil lagi karnay say safar shuru,

Mar mitnay ka hai yeh safar taveel,

Mitti kay putloun main jo talaashata,

Aakhir ko pehchaanta, kay khaliq he sacha khaleel.

Toota Hua Dil

Toota hua sa dil hai,

Dhoondhta apni manzil hai,

Janay khud ko rok paayay ga kabhi,

Jaantay hain, jaantay hain akhir ko sabhi,

Aakhir kahaan hai iss ka tikhaana,

Aakhir kahaan banayay ga ik aashiyaana,

Bikhray tukray iss kay toh na milain gay ab,

Sapnay jo sanjhoyay thay toot gaayay hain sab,

Phirta phir bhi hai dagar dagar,

Dhoondhta hai yeh koi humsafar,

Jis kay bikhray hua mun say hai jurh jaana,

Pankh laga kay, sung jis kay hai urh jaana,

Baahoun main uss ki pighlay, dil banay ga ik naiya,

Phool aisa ab khilay, kay jo waqt beet gaiya,

Bhool kay ussay, haath thaam woh chalay,

Jaanay jis bhi dagar peh ab zindagi lay chalay,

Toota hua sa dil hai,

Dhoondhta apni manzil hai,

Woh jis kay dum andhairay main jalay ga deeep,

Dum say jis ki, zindagi main khushi jaayay ge seeep,

Mushkilain kum naheen, per hoon gee asaan,

Dum say jis kay, dil dhoondhta woh insaan,

Muskurahut say jis ki, muskuraoun ga phir ik baar,

Ussay tuknay ko hai ab dil bekaraar,

Sung uss kay mukumal, ho ga yeh toota hua dil,

Phir mil he jaayay gee, issay iss ki manzil.

Bhoolay Na Yeh Dil

Dil bhoolta naheen raasta teray dil ka,

Mujhay tu yaad ab naheen per iss dil ko,

Samjha na paoun kay ab toh beet gai baat,

Phir na janay ab bhi kyun youn machaltay ho,

Tera naam sun kay kasak ab bhi uthtee hai,

Nighahain talaashti hain aik chehray ko,

Baras beet gaayay tujhay daikhay huay magar,

Tarapta hai yeh bin janay, janay kaisi dikhti ho,

Youn toh her su teri mehak thee he hamesha,

Teray itr ki khushbo toh yaad ab bhi hai,

Per janay kaisay maan leta hai yeh dil,

Kay tera ishq aani naheen bus jaani cheez hai,

Khafa hai, nidamut ka teri muntazir bhi naheen,

Udaas rehta hai, per khoya teray khayaaloun main he,

Tujh say naraaz hai per reh pata bhi naheen,

Janay kaisi ajab mohabbat hai tujh say yeh ki,

Sochta hoon kay jo mili toh gana gila ka gaoun ga,

Tujh say dil ko jo shikway, saray sunaoun ga,

Per na janay kya main aakhir kabhi keh paoun ga,

Bhula doon sab hamesha, shayud tujhay itna he chahoun ga,

Kaisay maan liya kay yeh zindigani sirf tumhari hai,

Kaisay mana kay youn chali jao gee,

Mana khatawaar hoon, per kehti toh kuch,

Bus chali gai kay jaisay ab na aaoun gee,

Nainoun main khonay wala teray,

Nain parhta tha zaroor teray hamesha,

Per teri muskurahut main kho ker kuch choot jaayay,

Tha iss ka bhi khoob andesha,

Haath thamay thay gar yeh maan kar,

Kay saath larain gay waqt ki her kathinai say,

Phir maan liya kaisay tujhay larhnay doon ga akailay,

Waqt say bhi, aur phir iss tanhai say,

Kamzor main naheen na ishq tha hamara,

Duniya ko thee iss he ishq ki toh khaar,

Jo dara kay tumhain door kiya mujh say,

Kay jo saath hotay toh na hoti teri haar,

Dil toota hai per jurh bhi jaayay ga,

Tu rukh morh lay, ab bhi chahay ga,

Dikh ja bus ik baar phir tu kaheen,

Tujhay ab bus phir janay na day paayay ga.

Muntazir

Khamoshi main bhi aik aahut si hoti hai,

Jab dil ko teray aanay ki chahut si hoti hai,

Bayrung zindigani main kuch rungoun ki barish kar ja,

Khushiyoun ki kuch youn sifarish he kar ja,

Kay ab toh sawun aayay baras he beet gaayay hai,

Per dastoor-e-duniya ki bhi reet kahay hai,

Kay muskaan bina aansoo aur aansoo bina muskaan,

Bhala in ki khanabadosh maujoodgi say, mehroom kaun insaan,

Thamtay he jana tha kay ik din woh waqt phir aayayga,

Jab talaashta teri parchai ko, andhayra chaayayga,

Uss din ik pal main aankhoun say ojhal hoti dikhay gee tu,

Aur main haath malta he reh jaoun ga, taktay teri su,

Kay tu toh karakhti dhoop main chaoun lai thee,

Haath thaamti, sambhaalti, jab aagay kuaan peechay khai thee,

Per thee tu bhi bus aik humsafar he,

Thee jo sar-e-rah mili youn he,

Khushi ki boundoun say tu nay barish barsai,

Apni lagi, per thee toh woh khushi bhi parai,

Aur dhoop nay toh phir aik din nikalna he tha,

Jaisay kismut main tera milna bhi tha,

Badal chathnay thay, dhoop parhni thee,

Anjaan bunta tha, per tu bhi toh barhni thee,

Aagay apni kisi manzil ki aur,

Kho gaya tera deewana bun, beech duniya kay shour,

Loag kehtay hain naam toh aasmanoun main miltay hain,

Kamal tub he toh milan say khiltay hain,

Phir taqdeer main jo hua tera mera milna kabhi,

Toh rok paayay na khud khudai, na duniya sabhi,

Muntazir rahoun ga teray deedar ka ikhtitaam tak,

Tera ho kay he faqt rahoun ga, aakhri aayaam talak.

Beparwah

Vasl-e-yar main, judaai kay ikhtitaam main,

Pehchani hum nay ahmiyut uss insaan ki,

Kay jo qarb main qurbat say karta tha malamaal,

Aaj jana kay faqt youn bhi zindagi uss nay asaan ki,

Dabay qadmoun, khamosh lamhoun,

Main bhi thehar kar maloom hota hai,

Muskuratay laboun say, mashooqana nigah say bhi,

Pas-e-parda reh kar bhi khushiyaan koi pirota hai,

Kamal-e-qudrat toh daikhyeh janaab,

Bin kiyay bayaan chaap chorh jatay hain kuch loag,

Per jo waqt peh aankh moondh parha rahay,

Jayaz nahi uss ka manana phir koi soag.

Iqraar

Bus youn daikhta rahoun tujhay umar bhar,

Youn he kut jaaye zindagi ka safar,

Haath main meray tera haath ho,

Zindagi hai haseen tu jo saath ho,

Teri muskaan peh jo dil haar betha,

Teri he khatir jeeta, hai jo kehta,

Hoon main wohi dilbar tera,

Aashiaana bana diya tunay ghar mera,

Teray dum say he ab roshan hai zindagi,

Khuda ka bunda hoon, karta uss he ki bundagi,

Per tujhay daikh maloom hota hai,

Khuda ki kudrat dayti kya tohfa hai,

Agar sabar say karo kisi humdum ka intizaar,

Toh jo chahay kahay duniya, na jata woh bekaar,

Lo tujh say aaj karta hoon dil khol k izhaar,

Teray he toh muntazir tha, madhooshkun khumaar,

Laakh karti thee tum jis baat peh israar,

Kay keh doun laboun say, aaj karta hoon iqraar,

Shayar nahi per deewana hua, shayud iss ka hai naam pyaar.

Bujhtay Diyay

Kabhi doobtay huay sooraj ko daikha hai,

Janay kis khayaal main hota hai,

Per manzar yeh bhi baymisaal hota hai,

Tuknay walay kay dil main malaal yeh hota hai,

Jo woh uss lumhay peh na aa sakay,

Aftaab ki taaq main jo beta tha kay,

Takay ga ussay jab woh jalaal main hota hai,

Deep bhi bhujhnay say pehlay youn timtimata hai,

Kay baymisaal toh woh manzar bhi kehlata hai,

Afreen toh loag uss peh bhi hotay hain youn kay kehtay,

Khuda ko laut janay walay say kuch woh mail khata hai,

Kay sooraj ki kirnoun kay libaas ki tarhaan,

Doobtay huay insaaan ki aas ki tarhaan,

Diya woh bhi kuch youn timtimata hai,

Kay wajood uss ka mitt raha hota hai,

Tub bhi deeda zaib manzar woh kehlata hai,

Khuda janay yeh mitti ka putla hai aseer kis ka,

Mureed hota hai faqeer akhir yeh kis ka,

In lamhoun ki khoobsoorati say kya karta hai aankhain chaar,

Ya afreen hota hai kisi ko daikh woh youn bebus-o-lachaar,

Kay jab rehta naheen hai khud peh kuch ikhtiyaar,

Toh nighahoun say taalaash kis ki karta hai mera yar,

Deewana hua yeh pagal uss kamaal ka,

Ya sakoon pata hai daikh nazara mujhboor kay haal ka,

Madhosh kya uss ki seharkun chaal say hota hai,

Ya qaid iss ka dil bhi kisi kay zawaal main hota hai.

Dil Chor, Daman Chorh

Jo bin poochay ilzaam lagaaye,

Izzat ko saray aam nilaam karaaye,

Nafrut ki aag main sulaghta jaaye,

Bin muqsad jo tum say khaar khaaye,

Aisay apnay ko apna kya kehna,

Dard aisi mohabbat k liyay phir kya sehna,

Woh jo kal tha tumhara ab ussay na hai rehna,

Toh khotay ho kyun woh muskan, tumhara gehna,

Woh jo rah main tujhay chorh gaiya,

Aik jhatkay main her naata torh gaiya,

Ghum daytay huay tumhain jhinjorh gaiya,

Moun tum say youn morh kay gaiya,

Aisay saaye ka peecha kya phir karna,

Aisay natay kay liyay kya til til marna,

Dukhoun say daman kyun phir bharna,

Aasoun say zindagi ko kyun tar karna,

Woh toh chorh gaiya tumhara saath,

Pal bhar main ujalay ko bana gaiya andhairi raat,

Phisal gaiya haathoun say jis ka haath,

Di jis nay tumharay khuloos ko maat,

Aisay zalim ki rah kya takna,

Mohabbat ko uss ki kya parakhna,

Tha yeh sab bhi aik bhaiyanuk sapna,

Phir kismut peh kya rona, kya tupna,

Bhool jao ussay kay ab woh tumhara nahi,

Hai aakhir ab bhi woh bus yahi,

Per intizaar ab uss ka na hai sahi,

Such yehi k adhoori yeh dastaan rahi.

Batil Kon

Hathyaar bhi mera, waar bhi mera,

Par dewaana dil bekaar bhi mera,

Kay taanoon nishana uss peh main,

Per jeena youn dushwaar bhi mera,

Muqabilay ko dil bekaraar bhi mera,

Muqabil say dil ko jo karaar, bhi mera,

Pathar sa sakht dikhnay wala,

Khamoshi say dil karta izhaar bhi mera,

Ashq uss k baaha nay wala,

Irada woh khatawaar bhi mera,

Machis jala aatishoun main lipta,

Sulaghnay wala gulzaar bhi mera,

Gharoor main karta chaknachoor ussay,

Woh aakhir toh hai yar bhi mera,

Per ab bus dil say hota na aur sehan,

Kyun k hai mera he par, ab bun gaiya woh tera.

Unkahi

Aankhoun he aankhoun main,

Dastaan ik bayaan ho gai,

Bikharti si meri duniya,

Baahoun main uss ki samo gai,

Lub peh thehar gaaye thay alfaaz meray,

Bheegi aankhoun main per woh kuch kho gai,

Kay jo kehnay ki himmut jutta na paya main, 

Woh dukh samatay, lo daikho woh gai,

Deewar tha main uss ki,

Bunay chala tha jis ka sahara,

Khara hoon aaj saamnay uss kay,

Lo wohi waqt laut aaya phir dobara,

Katehray main khara kiya tha duniya nay phir say,

Phir say sawaaloun kay teer chalay,

Ussay thaam loun sochta raha,

Phir laga loun dil say galay,

Par aaj phir woh iss dewaar ki dhaal bani,

Bina poochay kuch aisa yakeen kiya,

Kay haar baitha dil jaisay main phir say,

Deewana kuch aisa uss afreen nay kiya,

Kis lafz main shukriya ada karoun,

Kin alfaaz main maangoun maafi,

Karzdaar rahoon ga uss kay pyaar ka,

Bus yeh izhaar bhi hai ab nakaafi.

Heer Ranjha, Phir Se

Dhoop ki aagosh main,

Kabhi chaandni ko ubhartay daikha hai,

Taaroun k daaman main,

Kabhi roshni ko chamaktay daikha hai,

Sakoon sa hai pus uss main bhi,

Kuch aisa hai k jab bhi daikha hai,

Ehsaasaat k ik dariya main,

Khud ko doobtay daikha hai,

Woh uss k aasmaan ka woh suraj hai,

Jo karta hai uss ki duniya main ujala,

Manzar bhi khoob hai kuch un k milan ka,

Nazara daikha na hoga kuch aisa aala,

Palkain jhukayeh, deehray say woh muskayeh,

Madhum sa aik gulaabi sa rung,

Chehray peh uss k chah jayay,

Jab ho woh aur uss ka aaftaab sung,

Duniya bairi hai jin k pyaar ki,

Hain yehi wohi heer ranjha,

Woh patang hai apnay piya ki toh,

Aur woh hai uss patang ka manjha,

Azaad hai woh uss k pyaar main,

Na koi bandish na koi rukawut,

Phir bhi baandhti hai ussay woh dorh,

Hai iss qafus main bhi chehray peh muskurahut,

Qyaid kiya hai duniya nay jinhain,

Aazmaaishoun k pinjray main,

Panapti hai masoom si muhabbat ki roshni,

Uss he andhairay pinjray main.

Poetic Punnay

This is an archive for my Wattpad work by the same name.
Updates will be posted on both places.